Моўныя залацінкі
Як часта пры падрыхтоўцы да новых заняткаў настаўнікі шукаюць трапныя выслоўі, крылатыя фразы, прыгожыя выказванні на розныя тэмы! Я сама яшчэ студэнткай сутыкнулася з праблемай: кожны ўрок павінен быць прысвечаны пэўнай тэме, а ў адзіночку ды тым больш за адну-дзве ночы цяжка знайсці патрэбны матэрыял (сказы, тэксты, урыўкі вершаў).
Таму са студэнцкае пары я пачала збіраць "моўныя залацінкі" (выказванні беларускіх аўтараў пра мову, Радзіму, прыроду, маці і г.д.). На сённяшні дзень сабрана даволі многа (дзве тоўстыя запісныя кніжкі: адна маленькая, а другая вялікая). Сквапнасцю я ніколі не вылучалася, таму дзялюся з Вамі, мае калегі. Канешне, я не змагу перадрукаваць увесь сабраны матэрыял, але, спадзяюся, дапамагу маладым настаўнікам стварыць сваю калекцыю "залацінак мовы".
Дадзены раздзел вельмі карысны і для вучняў, таму што на наступных старонках яны могуць знайсці цытаты для сачыненняў на розныя тэмы. Можна выбраць тое выказванне, што найбольш спадабалася, і выкарыстаць яго ў якасці эпіграфа да сачынення, даследчай работы, рэферата і г.д.
І, як заўсёды, усе выказванні размеркаваны па групах. Чытайце, капіруйце і карыстайцеся! Жадаю Вам усялякіх поспехаў!
